دي مش نهاية القصه ودا مش أعجب ما فيها

اشتغل معايا بياع من حوالي عشر سنوات في فرع من فروعي
كان عندي فرعين في نفس العمارة
فرع أحذية مع شركائي وفرع ملابس لوحدي
شركائي كانوا بيتحايلوا عليا أخد الموظف ده في المحل بتاعي وأريحهم منه
لا هم قادرين يقطعوا عيشه ولا هم شايفين منه فايده
هادي وقليل الحيلة وقليل المواهب
بس أخ ملتزم الالتزام اللي بجد
طيبه شديده وأدب جم
اخدته في الفرع بتاعي ومسك مدير الفرع
وبعد مدة غلط غلطه تافهه بس أنا كنت في مرحلة الطغيان والاعتداد بالرأي والانفراد بالقرار والغباء الإداري
صممت إنه يمشي
الدنيا كلها تشفعت له دون جدوى
مشي
قليل الحيله
ضعيف المواهب
صفر في الامكانيات الماليه
الكلام ده تقريبا من ٧ أو ٨ سنوات
بعد ثلاث سنوات
عرفت قدرا إنه أصبح عنده ٦ محلات ملابس
واشترى سيارة
واصبح من مشاهير المجال واسمه جنيه ذهب
دلوقتي بس فهمت انا ليه مشيته
ماكانش فيه اي سبب اني أصر انه يمشي
كنت بستغرب من اصراري على انه يمشي ويسيب الشغل
رغم ان فيه ناس غيره عملت جرايم وانا مامشتهمش
ورغم انه كان امين ومهذب وكان فيه بينا محبة وثقة متبادلة
اصراري كان رغما عني
ربنا عز وجل كان أعد له مسار تاني وكان جه وقته فكان لازم يمشي
دي مش نهاية القصه
ودا مش أعجب ما فيها
.
الأعجب إنه أصبح تاجر حريف شاطر جدا ولعيب كمان
والأعجب إني احتجت له فوقف جنبي وماخذلنيش
والأعجب إنه لم يذكرني بما فعلته معه ولا عاتبني ولا لمح ولو بتغيير في نبرة صوته
يعاملني كأنني مازلت صاحب المحل الذي يعمل هو فيه
.

والأعجب إنه لم يفقد ذرة من التزامه وتدينه
كفايه أقول لكم إن أهم شهر في حياة تاجر الملابس والأحذيه هو شهر رمضان
شهر بالسنه كلها
وأهم عشر أيام في رمضان بالنسبة لنا كتجار ملابس وأحذيه العشرة الأخيره
في العشر أيام دول التليفون مابيتشالش من على ودننا
تركيز رهيب
وقلوب معلقة كل ساعة بالمبيعات
صاحبنا ده بقى بيقفل تليفونه في العشره الأواخر ويروح يعمل عمره
دخوله ع الواتس قليل
مالوش فيس تقريبا
.
ارسلت له رسالة عن حالة واحد غلبان من قريه في محافظته
طلبت منه يستوثق من الحالة
لو أي حد تاني كان طنش أو احتاج مني اتصالين تلاتة
انما صاحبنا لقيته تاني يوم الصبح بيكلمني من عند الراجل
.
التزام بتكبيرة الإحرام
ساعة مابيسمع الأذان بيتنفض من مكانه
.
الدروس من القصة :
- ‫#‏ورزق_له_لمن_لا_حيلة_له_يحير_أصحاب_الحيل‬
- لا تأس على شيء فاتك ، لو أنا ما فصلتوش من العمل كان زمانه يمكن لسه بياع بياخد مرتب ضعيف
.
دروس كتير قوي في الحكايه ياريت اللي شاف فيها درس أو عبرة يكتبه في تعليق